Showing posts with label Existence. Show all posts
Showing posts with label Existence. Show all posts

Monday, May 31, 2010

பாடம் 063: பரமன் தொடக்கமற்றவன் (பிரம்ம சூத்திரம் 2.3.9)

பரமன் நித்தியமாக இருப்பவன். வெளி, காற்று போல பரமன் தோற்றம்-மறைவு என்ற சுழற்சிக்கு உட்படாதவன் என்ற கருத்தை விளக்குவதுடன் ‘பரமன் இருக்கிறான்’ என்பதன் பொருளை இந்த பாடம் ஆராய்கிறது.

இருத்தல் என்றால் என்ன?

இருத்தல் என்றால் என்ன என்ற கேள்விக்கு பதில் கண்டுபிடிக்க உள்ளியல் (Ontology) என்ற துறை அரிஸ்டாடில் காலத்தில் துவக்கப்பட்டு அன்றிலிருந்து இன்றுவரை பல ஆராய்ச்சிகளும் விவாதங்களும் தொடர்ந்து நடைபெற்று வருகின்றன. இரண்டாயிரம் ஆண்டுகளுக்கு பின்னும் 'இருத்தல் என்றால் என்ன?' என்ற கேள்விக்கு விடை கண்டுபிடிக்கவில்லை என்று நம்மால் இந்த துறையை சேர்ந்த அறிஞர்களை குறை கூற முடியாது. ஏனெனில் அவர்கள் இந்த கேள்விக்கு தெளிவான பதில் கூறிய ஆதி சங்கரரை முழுவதுமாக ஏற்றுக்கொண்டு அவருக்கும் மற்ற அறிஞர்களின் வரிசையில் இடம் கொடுத்துள்ளார்கள். ஆனால் சங்கரரின் சரியான பதிலை மற்றவர்களின் தவறான பதில்களைப்போல் ஒரு தனிமனிதரின் கருத்து என்று முடிவு செய்துவிட்டு சரியான பதிலை யாராலும் என்றும் கொடுக்க முடியாது என்ற பிடிவாதத்துடன் இருக்கிறார்கள்.

‘இருக்கிறது’ என்ற சொல்லுக்கு சரியான பொருள் தெரியாமல் அதை உபயோகிக்கும் சாதாரண மனிதர்களைப்போல உள்ளியல், உளவியல் மற்றும் அறிவியல் ஆகிய அனைத்து துறைகளை சேர்ந்த அறிஞர்களும் தொடர்ந்து அஸ்திவாரம் இல்லாத கட்டடங்களை கட்டிக்கொண்டிருக்கிறார்கள். ‘இருத்தல்’ என்பதன் பொருளை கண்டுபிடிப்பது தற்போதைய உள்ளியல் துறை மாணவர்களுக்கு ஒரு பொழுதுபோக்காய் இருக்கிறது. ஆளுக்கு ஆள் தமக்கு தோன்றியதை கூறி சரியான பதிலை தெரிந்துகொள்ள மறுத்துவருகிறார்கள்.

இருத்தல் என்பது ஒரு பொருளின் குணமா, அனைத்து பொருள்களின் இருப்பிற்கும் ஆதாரமாக ஏதேனும் இருக்கிறதா என்பது போன்ற சரியான கேள்விகளை முன்வைக்கும் உள்ளியல் துறை, சரியான பதிலை புரிந்து கொள்ள திறனின்றி தொடர்ந்து அதே கேள்விகளை மட்டும் கேட்டு வருகிறார்கள்.

‘எனக்கு கேள்விகளை கேட்கத்தான் தெரியும்’ என்று கூறிய திருவிளையாடல் தருமியாவது ஆண்டவன் கூறிய பதில்களை புரிந்துகொள்ளும் சக்தி கொண்டிருந்தான். ஆனால் உள்ளியல் துறை அறிஞர்களுக்கு வேதத்தில் உள்ள சரியான பதிலை எடுத்துரைத்த ஆதிசங்கரரை ஒரு அறிஞர் என்று ஏற்றுக்கொள்ளும் அளவுதான் திறமை உள்ளதே தவிர அவர் கூறிய சரியான பதிலை புரிந்து கொள்ளும் சக்தி இல்லை.

இருத்தல் பொருள்களின் குணமல்ல

'நாற்காலி இருக்கிறது' என்ற சொற்றொடரில் உள்ள 'இருக்கிறது' என்ற வார்த்தை நாற்காலியின் ஒரு குணமல்ல. நாற்காலியை நெருப்பிலிட்டு கொளுத்திவிட்டபின் நாற்காலி சாம்பலாக மாறிவிடும். இப்பொழுது நாற்காலி சாம்பலாக இருக்கிறது. உலகில் உள்ள அனைத்து பொருள்களும் ஒன்றிலிருந்து ஒன்றாக மாறுமே தவிர முழுவதும் அழிவதில்லை. இந்த உண்மையை அறிவியல் அறிஞர்கள் முற்றிலும் ஏற்றுக்கொண்டுள்ளார்கள். எல்லா பொருள்களும் ஏதாவது ஒரு உருவத்தில் இருந்து கொண்டுதான் இருக்கின்றன. பொருள்களாக இல்லாவிட்டாலும் சக்தியாக மாறி தொடர்ந்து அவை இருக்கின்றன. எனவே இருத்தல் பொருள்களின் குணமல்ல என்றும் அது என்றும் இருக்கும் ஒரு தனிப்பட்ட அடிப்படை தத்துவம் என்றும் புரிந்து கொள்ள வேண்டும்.

இந்த தத்துவம்தான் பரமன். பரமன் இருக்கிறான். இதில் இருத்தல் என்பது பரமனின் இயல்பு.

பரமன் நித்தியமானவன் என்பதன் விளக்கம்

இருத்தல் என்பதை இயல்பாக கொண்டு இப்பிரபஞ்சம் முழுவதுமுள்ள அனைத்து பொருள்களின் இருப்பிற்கு ஆதாரமாக இருக்கும் பரமன் எந்த ஒருகாலத்திலும் இல்லாமலிருக்க முடியாது.

பரமன் தோன்றி மறைபவன் எனில் அவன் தோற்றத்தை அறிய வேறு ஒருவன் இருக்க வேண்டும். அவ்வாறு யாருமில்லாத காரணத்தால் பரமன் தோற்றமற்றவன் என்பதை அறியலாம்.

காரண காரிய வரிசையில் முதலில் இருக்கும் பரமனுக்கு காரணம் என்று யாரேனும் இருந்தால் அவன்தான் பரமன். பிரபஞ்சத்தின் தோற்றத்திற்கு காரணமானவன் பரமன். அவன் தோற்றபட்டவனல்ல. தோற்றுவிப்பவன் மட்டுமே.

ஒளி என்பது எப்படி இருட்டிலிருந்து உற்பத்தி ஆகாதோ அது போல இருத்தல் என்பது இல்லாமையிலிருந்து உருவாவது சாத்தியமில்லை.

களிமண் என்ற பொதுவான பொருளிலிருந்து குடம், ஜாடி, மூடி போன்ற குறிப்பிட்ட பொருள்கள் தோன்றும். குறிப்பிட்ட பொருள்களிலிருந்து ஒரு பொதுவான பொருள் தோன்றும் என்பது நமது தர்க்க அறிவிற்கும் அனுபவ அறிவிற்கும் ஒத்துப் போவதில்லை. எனவே அனைத்து வேறுபட்ட பொருள்களும் பரமனிடமிருந்து உருவாகியிருக்க, பரமன் எந்த ஒரு குறிப்பிட்ட பொருளிலிருந்தும் உருவாகும் வாய்ப்பேயில்லை.

பரமன் என்றும் இருப்பவனல்ல, தோற்றுவிக்கப்பட்டவன் என்று கூறினால் அவனை தோற்றுவித்தது யார் என்ற கேள்வியை எதிர்கொள்ள வேண்டியிருக்கும். பிரபஞ்சம் என்பது தொடர்ந்து மாறிக்கொண்டிருப்பதும் அது ஒரு குறிப்பிட்ட காலத்துக்குமுன் தோற்றுவிக்கப்பட்டது என்றும் நமக்கு அறிவியல் உலகம் தெளிவாக தெரிவிப்பதால் தோற்றுவித்தவன் என்று ஒருவன் இருக்க வேண்டுமென்றும் அவன் நித்தியமானவனாகத்தான் இருக்க வேண்டும் என்பதையும் நாம் தர்க்கத்தின் மூலம் தெரிந்துகொள்ளலாம். இருத்தல் என்பதை இயல்பாக கொண்ட பரமன் என்றும் இருப்பவன் என்ற இதே கருத்தை வேதமும் தெளிவாக சொல்கிறது.

முடிவுரை :

பரமன் மட்டுமே நித்தியமாக என்றும் இருப்பவன். அவன் தோற்றம் மறைவு போன்ற மாறுதல்களுக்கு அப்பாற்பட்டவன். இருத்தல் என்ற தனிபட்ட தத்துவத்தை அடிப்படையாக கொண்டே இப்பிரபஞ்சம் இருந்து வருகிறது. பிரளயத்துக்கு பின் இருத்தலை பரமனிடம் மட்டும் விட்டுவிட்டு பிரபஞ்சம் மறைந்து விடும்.

பயிற்சிக்காக :

1. பரமன் நித்தியமானவன் என்பதற்கு கூறப்பட்ட காரணங்கள் யாவை?

சுயசிந்தனைக்காக: :

1. உள்ளியல் (Ontology) துறை பற்றி அறிந்து கொள்க.


Monday, February 15, 2010

பாடம் 015: பார்ப்பவை பரமன் (பிரம்ம சூத்திரம் 1.2.13-17)

நாம் காணுமிடமெங்கும் நீக்கமற நிறைந்திருப்பவன் பரமன். பரமனை நம் கண்ணாலோ வேறு புலன்களாலோ அறியமுடியாது. இவ்விரு வாக்கியங்களில் இருப்பது போல் தோன்றும் முரண்பாட்டை 'பார்ப்பவை பரமன்' என்ற இப்பாடத்தின் மூலம் வேதம் நீக்குகிறது.

இருத்தல் என்பது பரமனின் இயல்பு.

ஒரு பொருள் உண்மையில் இருக்கிறதா இல்லையா என்பதை அறிய நமக்கு நமது கண், காது போன்ற புலன்கள் மட்டும் போதாது. நம்முடைய அறிவும் தேவை. நாம் கண்ணால் காணும் ஒரு பொருள் ஒவ்வொரு நொடியும் மாறிக்கொண்டே இருந்தால் நாம் அந்த பொருளை இருக்கிறது என்று சொல்ல மாட்டோம். பூனை யானையாகவும் யானை புலியாகவும் தொடர்ந்து நம் கண்ணெதிரே மாறிக்கொண்டே இருந்தால் நாம் இங்கு ஏதோ மாயம் நடக்கிறது, பூனையோ யானையோ உண்மையில் எதுவும் இங்கு இல்லை என்று கூறுவோம். இவை இது மாதிரி ஒவ்வொரு நொடியும் மாறாமல் ஒவ்வொரு நாளும் மாறிக்கொண்டிருந்தால் நமது கருத்து என்னவாயிருக்கும்?

ஒரு பொருளை இருக்கிறது என்று சொல்வதற்கு அது என்றும் மாறாமல் இருக்க வேண்டும். இறந்த காலம், நிகழ் காலம், எதிர் காலம் ஆகிய மூன்று காலங்களிலும் எது மாறாமல் இருக்கிறதோ அதை மட்டுமே 'இருக்கிறது' என்ற சொல்லுக்கு பொருளாக கொள்ள முடியும். மற்றவை எதுவும் இல்லை. அவை இருப்பது போல தெரியும் மாயத்தோற்றங்களே.

அதாவது இந்த உலகம் இருப்பது போல தோன்றும் ஒரு மாயை. உண்மையில் அது இல்லவே இல்லை. இருப்பது பரமன் மட்டுமே.

ஒரு பொருள் இருக்கிறதா இல்லையா என்ற கேள்விக்கு எந்த வித ஆதாரமும் இல்லாமல் 'ஆம்' என்று நம்மால் பதில் சொல்ல முடியுமா? முடியும். 'நான் இருக்கிறேன்' என்ற ஒரே ஒரு பதிலைத்தான் நமது உடல், புலன்கள் மற்றும் மனது ஆகியவற்றின் துணையின்றி நம்மால் உறுதியாக உணரமுடியும். இந்த 'நான்' என்ற உணர்வே பரமன். பரமன் மட்டும்தான் இருக்கிறான். நமது உடல், புலன்கள், 'நான்' என்ற எண்ணத்துடன் கூடிய நம் மனம் இவையனைத்தும் மாறிக்கொண்டேயிருக்கும் இந்த உலகத்தைச் சேர்ந்தவை. ஆகவே அவை மாயை. இவற்றையெல்லாம் அறியும் நான் மாறாத பரமன்.

இந்த உலகத்தில் உள்ள அசையும் மற்றும் அசையா பொருட்கள் அனைத்தும் வெறும் அணுக்களின் கூட்டமைப்பேயாகும். அணுவின் அடிப்படை தன்மையை ஆய்ந்தறிந்த அறிஞர்கள் அணு என்பது உண்மையில் இருக்கிறதா இல்லையா என்பதை தீர்மானமாக சொல்ல முடியாது என்று உறுதியாக சொல்கிறார்கள்.*a

உலகில் உள்ள பொருள்கள் அனைத்தும் 'இருத்தல்' என்ற தன்மையை பரமனிடமிருந்து கடன் வாங்கியுள்ளன என்ற வேதத்தின் கருத்தை விஞ்ஞானிகள் சந்தேகத்திற்கிடமில்லாமல் நிரூபித்துள்ளனர்.*b

நாம் இதை நமது அனுபவபூர்வமாகவும் அறிந்து கொள்ளலாம். நாம் கனவு காணும் பொழுது கனவுலகத்தில் இருக்கும் அனைத்து பொருட்களும் நமது எண்ணத்தின் வெவ்வேறு வடிவங்களே தவிர உண்மையில் அவற்றுக்கு 'இருத்தல்' என்ற தன்மையில்லை. நமது கனவு தொடரும் வரை கனவுலகில் இருக்கும் எல்லா பொருட்களும் இருப்பது போல் தோற்றமளிக்கும். கனவில் யாரேனும் நம்மிடம் நாம் அனுபவிக்கும் கனவுலகம் உண்மையல்ல, அது ஒரு மாயத் தோற்றம் என்று கூறினால் நாம் அவரை நம்ப மாட்டோம். கனவில் நடப்பதுதான் உண்மை என்ற உறுதி நம் மனதை விட்டு விலகாது. ஆனால் உறக்க நிலையிலிருந்து விழித்துக்கொண்டால் அதுவரை நாம் அனுபவித்த கனவுலகம் முழுவதும் ஒரு மாயை என்று உணர்வோம்.

அதே போல் இவ்வுலகை நாம் அனுபவிக்கும்பொழுது அது இல்லை, உலகம் ஒரு மாயை என்ற கூற்றை நாம் பொதுவாக அலட்சிய படுத்திவிடுவோம். ஆனால் வேதம் மற்றும் அறிவியல் அறிஞர்களின் கண்டுபிடிப்பு ஆகிய இரண்டும் இதை உறுதியுடன் கூறுவதால் நாம் 'உலகம் ஒரு மாயை' என்பதை என்னால் புரிந்து கொள்ள முடியவில்லை என்று சொல்லலாமே தவிர அதை உண்மையில்லை என்று கூறமுடியாது. உலகம் உருண்டை என்பதை புரிந்து கொள்ள முடியாமல் இருப்பதில் தவறு இல்லை. ஆனால் உலகம் உருண்டையாக இருக்கமுடியாது என்று சாதிப்பதுதான் தவறு. அதே போல் இந்த உலகம் நமது கனவு உலகத்தைப் போல ஒரு மாயத்தோற்றம், உண்மையில் அது இல்லை என்ற கருத்தை நாம் நமக்கு புரிந்தாலும் புரியாவிட்டாலும் முதலில் ஏற்றுக்கொள்ள வேண்டும். பிறகு ஆசிரியரின் உதவியுடன் நமது சந்தேகங்களை தீர்த்துக் கொண்டு எப்படி கண்ணுக்கு முன்னால் இருந்து கொண்டிருக்கும் உலகத்தை இல்லை என்று சொல்ல முடியும் என்பதை உறுதியாகத் தெரிந்து கொள்ள வேண்டும். குறைவில்லா இன்பத்தை நாம் அனுபவிக்க இந்த அறிவு மிகவும் முக்கியமானது.

நமது கனவிலிருக்கும் எந்த பொருளும் நமது எண்ணத்திற்கு அப்பாற்பட்டு இருக்கமுடியாது. அதேபோல் இவ்வுலகில் உள்ள அனைத்து பொருட்களும் பரமனிடமிருந்து வேறானவையல்ல.

நமக்கு கனவுலகை உருவாக்கும் சக்தியிருப்பது போல பரமனுக்கு இந்த உலகத்தை இருப்பதாக காட்டும் சக்தி உண்டு. 'உண்மை' என்பது மூன்று வகைப்படும். கனவு என்பது நமக்கு மட்டும், கனவு காணும் நேரத்தில் மட்டும் இருக்கும் தனி உண்மை (Subjective reality). இவ்வுலகிலிருக்கும் அனைத்து பொருட்களும் நிகழ்வுகளும் நமக்கும் சுற்றியுள்ள மனிதர்களுக்கும் ஒரு குறிப்பிட்ட காலத்துக்கு இருக்கும் பொதுவான உண்மை (Relative reality). பரமன் மட்டுமே என்றும் மாறாத முக்கால உண்மை (Absolute reality). பொது உண்மையான நமது மனம் தனி உண்மையான கனவுலகத்தை படைப்பது போல முக்கால உண்மையான பரமன் இந்த பொது உண்மையான உலகத்திற்கு அடிப்படை.

முடிவுரை :

பரமன் மட்டுமே இருக்கிறான். இந்த உலகம் இருப்பது போல தோன்றும் மாயத்தோற்றம். கயிறு பாம்பாக தெரிவது போல பரமன் இந்த உலகமாக நம் கண்களுக்கு தெரிகிறான். கயிற்றை பாம்பாக பார்த்து பயம் கொள்ளுவது அறிவீனம். பார்க்கும் பாம்பு உண்மையில் கயிறுதான் என்ற அறிவு நமக்கு ஏற்பட்டால் நமது பயம் தெளிந்து நிம்மதி பிறக்கிறது.

கனவிலிருந்து விழித்தவுடன் கனவில் அனுபவித்த துன்பங்கள் எப்படி உடனே மறையுமோ அது போல தகுந்த ஆசிரியரின் உதவியுடன் நாம் இந்த மாய உலகத்திலிருந்து விழித்துக்கொண்டால் வாழ்க்கையில் நடக்கும் நிகழ்வுகள் உண்மைகள் அல்ல என்று புரிந்து கொள்வோம். பின் வாழ்வு முழுவதும் குறைவில்லாத இன்பம்தான்.

பயிற்சிக்காக :

1. மூன்று விதமான உண்மைகள் யாவை?
2. இருப்பது போல் தோற்றமளிக்கும் இந்த உலகம் உண்மையில் இல்லை என்பதை அறிவியல் மூலம் விளக்குக.
3. நான் என்ற உணர்விற்கும் நான் என்ற நினைவிற்கும் என்ன வேறுபாடு?

சுயசிந்தனைக்காக :

1. நம் வீட்டில் நடக்கும் ஒரு சோக நிகழ்வை கனவாக கருதி எப்படி நம்மால் தொடர்ந்து இன்பமாக இருக்க முடியம்?
2. மாறாத உண்மையைத்தவிர எப்பொழுதும் மாறிக்கொண்டே இருக்கும் உண்மை என்று ஏதேனும் இருக்கிறதா?
3. கனவு காணும் பொழுதே இது கனவுதான் என்ற அறிவுடன் கனவில் நடக்கும் நிகழ்வுகளில் பங்கேற்க முடியுமா?

*a Uncertainty principle of Werner Heisenberg
*b MIT's Frank Wilczek and Richard Feynman

Tuesday, February 2, 2010

பாடம் 007: அனைத்துமாக விளங்குபவன் பரமன் (பிரம்ம சூத்திரம் 1.1.20-21)

பரமன் என்று ஒருவன் இருக்கிறான் என்று கூறும் வேதம் பரமன் மட்டுமே இருக்கிறான் என்றும் கூறுகிறது. இதன் பொருளை அறிந்து கொள்ள நாம் பின்வரும் இரு வாக்கியங்களிடையே இருக்கும் வேற்றுமைகளை ஆராய வேண்டும்.

'என் வீட்டில் ஒரு மரம் இருக்கிறது' என்று சொல்வதற்கும் 'பரமன் ஒருவன் இருக்கிறான்' என்று சொல்வதற்கும் ஏழு வேற்றுமைகள் உள்ளன.

முதல் வேற்றுமை : இடமில்லா தன்மை

மரம் இருக்குமிடம் என் வீடு. இந்த மரம் என் வீட்டில் இருப்பதால் அது வேறு எங்கும் இல்லை என்ற கருத்து சொல்லாமலேயே விளங்கும். ஆனால் பரமனுக்கு இது போல 'இருக்கும் இடம்' என்ற ஒரு தன்மை கிடையாது. பரமன் இல்லாத இடம் என்று ஒன்றில்லை. பார்க்குமிடமெங்கும் நீக்கமற நிறைந்திருப்பவன் பரமன்.

இரண்டாம் வேற்றுமை : காலமில்லா தன்மை

இப்பொழுது மரம் இருக்கிறது என்று கூறினால், ஒரு காலத்தில் இந்த மரம் இல்லாமல் இருந்தது என்றும் பல வருடங்களுக்கு பிறகு அது இல்லாமல் போகுமென்பதும் சொல்லித் தெரிய வேண்டியதில்லை. ஆனால் பரமன் காலத்தை கடந்தவன். அவன் இல்லாத காலம் இது வரை இருந்ததில்லை இனி இருக்கப்போவதுமில்லை. பரமன் எப்பொழுதும் இருப்பவன்.

மூன்றாம் வேற்றுமை : மாற்றமின்மை

மரம் சிறிய செடிபோல் இருந்து இப்பொழுது பெரிதாக வளர்ந்துள்ளது. வசந்த காலத்தில் இருக்கும் மரம் இலையுதிர் காலத்தில் இருக்கும் மரத்திலிருந்து மிகவும் மாறுபட்டாதாயிருக்கும். பரமன் எப்பொழுதும் எந்தவித மாற்றமும் இல்லாமல் இருப்பவன். மரம் தோற்றம், வளர்ச்சி, இளமை, முதுமை, மறைவு என்று பல மாறுதல்களுக்கு உட்பட்டது. பரமன் மாறாத தன்மையுடையவன்.

நான்காம் வேற்றுமை : பாகமில்லாத முழுமை

வேர், அடிமரம், கிளைகள், இலைகள் என்று பல்வேறு பாகங்களுடன் கூடியது மரம். பரமன் எந்தவித பாகங்களுமில்லாமல் எப்பொழுதும் முழுமையாக இருப்பவன்.

ஐந்தாம் வேற்றுமை : ஒப்பில்லா தனிமை

என் வீட்டில் இருப்பது மாமரம் என்றால் எண்ணிக்கையற்ற மாமரங்களில் ஒன்று என் வீட்டில் உள்ளது என்று அர்த்தம். பரமன் இருக்கிறான் என்றால் ஒன்றுக்கும் மேற்பட்ட பரமன்கள் இருப்பது சாத்தியமில்லை என்றும் இருப்பவன் பரமன் மட்டுமே என்றும் புரிந்து கொள்ள வேண்டும்.

ஆறாம் வேற்றுமை : ஒன்றுபட்ட தனிமை

பலா மரம், தென்னை மரம் போன்ற மரங்கள் மாமரத்திலிருந்து வேறுபட்டவை. என் வீட்டில் இருப்பது மாமரம் என்றால் அதனுடன் ஒரு தென்னை மரம் இருப்பதற்கும் வாய்ப்புள்ளது. பரமன் இருக்கிறான் என்றால் பரமனை போல வேறு எதுவும் எங்கும் இல்லை என்று பொருள்.

ஏழாம் வேற்றுமை : வேறுபாடில்லா தனிமை

குருவி, கரடி போன்றவை மரத்திலிருந்து வேறானவை. இது போல பரமனிடமிருந்து வேறான எதுவும் கிடையாது.


பரமன் இருக்கிறான்.

மேல் சொல்லப்பட்ட ஏழு வேற்றுமைகளையும் நன்றாக புரிந்து கொண்டால் பரமன் இருக்கிறான் என்பதன் பொருள் நமக்கு ஓரளவு விளங்கும். இருத்தல் என்பது பரமனின் தன்மை. பரமன் அறிவு உருவானவன், ஆனந்த மயமானவன் என்று நாம் அறிந்து கொண்டது போல பரமன் இருத்தலில் இருந்து வேறுபட்டவனல்ல என்றும் புரிந்து கொள்ள வேண்டும்.

வெப்பம் என்பது தண்ணீரின் இயல்பான தன்மையல்ல. நீர் குளிர்ச்சியாகவோ சூடாகவோ இருக்கலாம். வெப்பம் நீரின் ஒரு தற்காலிக நிலை. அது போல இருத்தல் என்பது பொருள்களின் ஒரு நிலை. அவை இருக்கலாம் அல்லது இல்லாமலுமிருக்கலாம்.
ஆனால் வெப்பம் நெருப்பின் இயல்பு. நெருப்பு எப்பொழுதும் சுடும். அது போல பரமன் எப்பொழுதும் இருப்பவன். இருத்தல் பரமனின் இயல்பு.

நீர் சூடாக இருந்தால் அது நெருப்பின் சுடும் தன்மையை தற்காலிகமாக கடன் வாங்கியுள்ளது என்று அர்த்தம். நெருப்பிலிருந்து நீரை விலக்கி விட்டால் அது தன் வெப்பத்தை இழந்துவிடும். அதே போல ஒரு பொருள் இருக்கிறது என்றால் அது இருத்தல் என்ற தன்மையை பரமனிடமிருந்து கடன் வாங்கியுள்ளது என்று அர்த்தம்.

சுடுவதெல்லாம் நெருப்பு. இருப்பதெல்லாம் பரமன்.

முடிவுரை :

பரமன் அறிவு உருவானவன். ஆனந்த மயமானவன். இருத்தல் அவனது இயல்பு. பரமன் ஒருவன் இருக்கிறான் என்பது மற்ற பொருள்கள் இருக்கின்றன என்று சொல்வதிலிருந்து ஏழு விதங்களில் மாறுபட்டது.


பயிற்சிக்காக :

1. பரமன் இருப்பதற்கும் ஒரு மரம் இருப்பதற்கும் உள்ள ஏழு வேறுபாடுகள் யாவை?
2. பரமனின் மூன்று இயல்புகள் என்னென்ன?

சுயசிந்தனைக்காக: 

1. மரமும் பரமனும் ஒன்றா அல்லது வெவ்வேறானவையா?

2. பொருட்கள் இருத்தல் என்ற தன்மையை பரமனிடமிருந்து கடன் வாங்கியிருப்பின் அவை இல்லை என்று ஆகும் பொழுது பரமனுடன் தொடர்பற்றவைகளாக மாறிவிடுமா?

3. சச்சிதானந்தம் என்று வழக்கில் இருந்து வரும் பெயரின் பொருளை ஆராய்க.