பரமனிடமிருந்து உருவான புலன்கள் நமது ஐந்து கோசங்களில் ஒன்றான பிராணமய கோசத்தின் ஒரு பகுதி என்றும் அவை நமது பருவுடலிலிருந்து வேறுபட்டவை என்றும் இந்த பாடம் விளக்குகிறது.
பருவுடல், நுண்ணிய உடல் மற்றும் காரண உடல் என்ற நமது மூன்று உடல்களை ஐந்து கோசங்களாக பிரித்து காண்பிப்பதன் மூலம் நுண்ணிய உடலின் செயல்பாடுகளை மேலும் ஆழமான முறையில் வேதம் நமக்கு விவரிக்கிறது.
அன்னமயகோசம் (Physical Layer)
உணவினால் உருவான பருவுடல் முழுவதும் அன்னமய கோசம் என்ற பெயரில் வழங்கபடும். பெற்றோருக்கும் பிள்ளைகளுக்கும் இடையே உள்ள உருவ ஒற்றுமைக்கு காரணம் இந்த பருவுடல் பெற்றோர் உண்ட உணவின் மாறுபாட்டிலிருந்து தோன்றியது என்பதை காண்பிக்கும். உடலின் பௌதீக அடிப்படையின் காரணமாக தோன்றும் அனைத்து வியாதிகளும் வழிவழியாக தொடர (hereditary) வாய்ப்புகள் அதிகம். இவ்விரண்டைத்தவிர வேறு எந்த குணமும் பெற்றோரிடமிருந்து பிள்ளைகளுக்கு வராது.
பிள்ளைகளின் புத்திசாலித்தனம், மனபக்குவம், பாட்டுபாடும் திறன், விளையாட்டில் ஈடுபாடு போன்றவற்றிற்கு பெற்றோர்கள் காரணமல்ல. ஏனெனில் இவையனைத்தும் முந்தய பிறப்பில் செய்தகாரியங்களின் விளைவாக ஒவ்வொருவராலும் தன் சொந்த முயற்சியால் ஈட்டப்பட்ட குணங்கள். இவற்றிற்கும் பெற்றோர்களுக்கும் எவ்வித சம்பந்தமும் இல்லை.
பிள்ளைகள் பெற்றோர்கள் மூலமாக இவ்வுலகிற்கு வருகிறார்களே தவிர பெற்றோர்களிடமிருந்து வருவதில்லை. பெற்றோர்களிடமிருந்து பெறுவது அன்னமயகோசம் ஒன்று மட்டுமே. மற்ற நான்கு கோசங்களும் ஒவ்வொரு உயிரினத்தின் தனிச்சொத்து. எனவே முகசாடை மற்றும் தோலின் நிறம் தவிர பெற்றவர்களுக்கும் பிள்ளைகளுக்கும் இடையே இருக்கும் மற்ற ஒற்றுமைகள் அனைத்தும் நண்பர்களிடையே இருக்கும் ஒற்றுமை போல காரண காரிய சம்பந்தம் இல்லாதவை.
பிராணமயகோசம் (Physiological Layer)
பருவுடலை உள்ளிருந்து ஆளும் நுண்ணிய உடல் மூன்று கோசங்களாக பிரிக்கப்படுகிறது. அவை பிராணமயகோசம், மனோமயகோசம் மற்றும் விஞ்ஞானமயகோசம் ஆகியவை.
நுண்ணிய உடலில் உள்ள 19 உறுப்புகளில் புத்தி, அகங்காரம், மனம், சித்தம் ஆகிய நான்கைத்தவிர எஞ்சியுள்ள பதினைந்து உறுப்புகளை உள்ளடைக்கியது பிராணமயகோசம். நமது புலன்களும் கரணங்களும் பிராணன்களும் சேர்ந்த இந்த பிராணமய கோசம் மனோமயகோசத்திற்கும் அன்னமயகோசத்திற்கும் பாலமாக அமைந்துள்ளது. எனவேதான் பிராணாயாமம் என்கிற முறையாக மூச்சை உள்ளிழுத்து வெளியிடும் உடல்பயிற்சியால் மனதை அமைதிபடுத்த முடிகிறது.
மனோமயகோசம் (Psychological Layer)
புத்தி, அகங்காரம், மனம் மற்றும் சித்தம் என்ற நான்கு வகைபட்ட எண்ணங்களை கொண்ட நமது மனம் மனோமயகோசத்தை சேர்ந்தது. பிராணமயகோசத்தை சேர்ந்த புலன்களையும் கரணங்களையும் நேரடியாக கட்டுபடுத்துவது மனோமயகோசம் ஆகும்.
விஞ்ஞானமயகோசம் (Intelligence Layer)
அறிவுருவான பரமனின் வெளிப்பாடான இந்த கோசம் மனோமயகோசத்தின் தொகுப்பாக அமைகிறது. நமது புலன்களின் மூலம் வெளியுலகை பற்றிய செய்திகள் மனதில் பக்குவபடுத்தப்பட்டு ஞானமாக விஞ்ஞானமயகோசத்தை சேர்கிறது. மனதை கடலில் தோன்றும் அலைகளுக்கு ஒப்பிட்டால் ஆழ்கடலை விஞ்ஞானமயகோசத்திற்கு ஒப்பிடலாம். நமது மனதின் உளத்திண்மை, மனப்பக்குவம், மன உறுதி ஆகியவை நமது விஞ்ஞானமய கோசத்தின் அடிப்படையில் அமைகிறது.
ஆனந்தமயகோசம் (Happiness Layer)
நமது காரணவுடல் முழுவதும் ஆனந்தமய கோசம் என்ற பெயரில் வழங்கபடும். பரமனின் ஆனந்த மயத்தின் வெளிப்பாடு என்பதால் நமது காரண உடலுக்கு இந்த பெயர்.
தோற்றம்
பருவுடல் ஒவ்வொரு முறை இறந்து மீண்டும் பிறக்கும்பொழுதும் நுண்ணிய உடல் பிரளயத்துக்கு பின் மீண்டும் உலகம் தோற்றுவிக்கும்பொழுதும் புதிதாக தோன்றுகிறது என்பதை முந்தய பாடங்களிலிருந்து அறிந்துள்ளோம். காரண உடலுக்கு தோற்றம் கிடையாது.
முடிவுரை :
நமது உடலை ஐந்து பாகங்களாக பிரித்து ஒவ்வொரு பாகத்தின் செயல்பாடுகளை தனித்தனியாக விளக்குவதன் மூலம், பிராணன் என்பது நம்மைச்சேர்ந்தது என்றாலும் அது ஒரு சுதந்திரமான தனிபட்ட ஒரு தத்துவம் என்பதை வேதம் கூறுகிறது. நம்மிடம் ஒரு குதிரை வண்டி இருந்தால் வண்டியைபோல குதிரையும் நமது சொத்து. ஆனால் குதிரை என்பது ஒரு தனிபட்ட ஒரு உயிரினம். அது வண்டி நிற்க வைத்த இடத்தில் அசையாமல் இருப்பது போல இருக்காது. குதிரை தனக்கென ஒரு ஆளுமையை கொண்டிருக்கும். தினம் நாம் பயணம் செய்யும் பாதையை பற்றிய அறிவை அது அடையும். வண்டியை பாதுகாப்பதைவிட குதிரையை பாதுகாக்க நாம் அதிக நேரமும் பணமும் செலவிட வேண்டும். அதேபோல நமது புலன்கள் பிராணமயகோசத்தை சேர்ந்த அங்கம் என்ற கருத்தின் மூலம் அவற்றை எவ்வாறு பாதுகாக்க வேண்டும் என்ற அறிவை நமக்கு புகட்ட இந்த இரண்டாம் அத்தியாயத்தின் கடைசி பகுதி பிராணமய கோசத்தின் அளவையும், எண்ணிக்கையையும் செயல்பாட்டையும் நமக்கு தருகிறது.
பிரளயத்திற்குபிறகு பரமன் தன் மாயாசக்தியால் பிரபஞ்சத்தை மறுபடியும் தோற்றுவிக்கிறான். ஜடப்பொருள்கள் தொடர்ந்து மாற்றமடைந்து உயிரினங்கள் வாழத்தக்க சூழ்நிலை ஏற்படுகிறது. அப்பொழுது பரமனின் மாயாசக்தியின் ஒருபகுதியான காரண உடலில் பதிவாகியுள்ள கர்மபலன்களுக்கேற்றவாறு நுண்ணிய உடல்கள் தோற்றுவிக்கப்பட்டு அவை பூமியில் உள்ள ஜடப்பொருள்களுக்குள் புகுந்து உயிரினமாக பிறக்கின்றன. எனவே புலன்களை தோற்றுவித்தது பரமன்தான் என்பதையும் நாம் அறியவேண்டும்.
பயிற்சிக்காக :
1.மொத்தம் எவ்வளவு கோசங்கள்? அவை யாவை?
சுயசிந்தனைக்காக :
1. பாடகியின் மகள் பாடகியாகவும் நடிகரின் மகன் நடிகராகவும் ஆவதற்கு காரணம் என்ன?
